Stefna

Framtíðarsýn

Framtíðarsýn RB er að auka gæði og hagkvæmni fjármálaþjónustu á Íslandi RB nær því með þróun framsækinna og öruggra lausna og þjónustu sem eru bæði vel samþættar og samnýttar af markaðnum.

Stefna RB

Uppitími lykillausna
99,99%
Starfsánægja
4,20 af 5
Ánægja með þjónustu
3,90 af 5
Viðmót starfsfólks
4,3 af 5

  

Árangursmælikvarðar

Vinnustaðurinn

Skemmtilegur vinnustaður

Við gætum við þess að hlúa að starfsfólki okkar og bjóða því upp á afbragðs starfsaðstöðu svo hæfileikar þess fái notið sín sem allra best

Vinnustaðurinn
Upplýsingaveitan

Fréttir, blogg og viðburðir

Fréttir
20.10.2017

Þjóðarhagsmunir og greiðslumiðlun

Dagsdaglega göngum við út frá því sem gefnu að geta nýtt greiðslukortin okkar til að greiða fyrir vöru og þjónustu. Einstaka sinnum koma upp tæknilegir hnökrar sem valda því að ekki sé hægt að nota kortin til að greiða og rata slík tilvik nær alltaf í fjölmiðla, jafnvel þótt atvikið vari í bara nokkrar mínútur og hafi eingöngu áhrif á hluta kortahafa.

Ein af þeim spurningum sem yfirvöld standa fram fyrir, er hvernig hægt sé að tryggja greiðslumiðlun þegar vá steðjar að, í samfélögum þar sem reiðufé hefur verið nærri útrýmt. Ef til viðskiptadeilna kæmi milli tveggja ríkja væri t.d. hægt að loka á virkni greiðslukorta í tilteknu landi ef yfirvöld í Bandaríkjunum settu þrýsting á bandarísku kortasamsteypurnar? Sagan segir okkur að svarið við því er já. Bandarísk stjórnvöld lögðu árið 2014 viðskiptaþvinganir á rússnesk stjórnvöld og fyrirtæki vegna stríðsins í Úkraínu. Einn þáttur í þeim viðskiptaþvingunum var að loka á viðskipti kortasamsteypanna Visa og MasterCard við Bank Rossiya og Sobinbank(1).

En það þarf ekki endilega stjórnvaldaðgerðir til þess smágreiðslumiðlun í landi sé ógnað. Við hrun íslensku bankanna í október 2008 kom til álita hjá erlendu kortasamsteypunum að loka greiðslukortum á Íslandi vegna ótta um að útgefendur kortanna, þ.e. gömlu bankarnir, gætu ekki gert upp við færsluhirða sem þurftu að standa skil á greiðslum til kaupmanna. Sú hótun náði í reynd aðeins til kreditkortanna því debetkortakerfið, sem búið var til hjá RB, var að fullu undir innlendri stjórn þannig að erlendu kortasamsteypurnar gátu ekki gripið til lokunaraðgerða hvað þau varðar hér á landi. Debetkortakerfið frá RB er í raun innlent kortakerfi þó það sé framleitt fyrir erlendu kortasamsteypurnar. Því var hægt að tryggja að debetkortin myndu virka áfram á Íslandi þótt að á tímabili hafi litið út fyrir að lokað yrði á notkun þeirra erlendis.

Seðlabankanum tókst þessa sömu helgi að koma í veg fyrir bæði lokun kreditkorta og tryggja fulla virkni debetkortanna erlendis. Þetta og það að almenningi var tryggður aðgangur að innstæðum sínum gerði það að verkum að innlend greiðslumiðlun hélst virk þrátt fyrir önnur óþægindi og þann fjárhagslega skaða sem af hruninu leiddi. Almenningur gat farið út í búð og keypt vörur og þjónustu. Hefði þessi starfsemi ekki verið til staðar, þá hefðum við mögulega verið að tala um annars konar byltingu en búsáhaldabyltingu.

Öryggi greiðslumiðlunar með tilkomu nýrra greiðslumiðla

Með tilkomu nýrra greiðslumiðla er vert að spyrja sig hvort við verðum eitthvað betur sett hvað varðar öryggi íslenskrar greiðslumiðlunar? Eins og oft er þegar breytingar eiga sér stað að þá er svarið já og nei. Fjölgun greiðslumiðla, t.d. möguleikinn á að nota farsímagreiðslur sem byggja á innlánareikningum banka í stað kreditkorta, eykur rekstrarlegt öryggi í greiðslumiðlun landsins. Þótt að ein greiðslurás rofni að þá er líklegt að hin sé opin og aðgengileg neytendum, enda byggja greiðslurásirnar tvær á aðskildum tæknilegum innviðum.

En ef við horfum til kerfislegu áhættuþáttanna tveggja, sem nefndir voru hér að ofan, að þá yrðu þeir enn til staðar með tilkomu farsímagreiðsluappa. Þeir flytjast í raun einfaldlega frá kortasamsteypunum, þ.e. VISA og MasterCard, til tæknirisanna Google og Apple sem hvor um sig reka gríðarlega mikilvæg markaðstorg fyrir alls konar öpp. Fyrirtækin geta að eigin frumkvæði eða í samræmi við stjórnvaldsaðgerðir stöðvað virkni farsímagreiðsluappa með að minnsta kosti tvennum hætti. Í fyrsta lagi geta félögin fjarlægt öpp greiðsluþjónustuveitanda úr Apple Appstore eða Google Play, og þannig komið í veg fyrir að nýir notendur geti náð í öppin. Í öðru lagi geta þau komið í veg fyrir að öpp virki á farsímum með uppfærslum á stýrikerfum farsímanna. Notandi farsímans þarf hins vegar að samþykkja uppfærsluna áður en hún er framkvæmd. Það að samþykki notandans þurfi til að uppfæra stýrikerfið dregur verulega úr skammtíma áhrifum kerfislegrar áhættu sem gæti skapast vegna deilna við utanaðkomandi stjórnvöld eða við tæknirisana. Svo lengi sem stýrikerfi símans er ekki uppfært eða sjálft greiðsluappið er ekki fjarlægt úr símanum getur neytandinn nýtt símann til að greiða fyrir vöru og þjónustu á Íslandi.(2)

Íslenskt farsímagreiðsluskema eykur öryggi í greiðslumiðlun

Eins og ég hef fjallað um í öðrum pistlum (sjá www.rb.is) munu ný greiðsluþjónustulög, PSD2, opna aðgengi nýrra aðila að innlánareikningum bankanna. Lögin gera ráð fyrir að svo kallaðir greiðsluvirkjendur, megi með samþykki neytenda framkvæma greiðslur beint af innlánareikningi neytandans. Samkvæmt lögunum ber bönkum að veita greiðsluvirkjendum aðgengi að innlánareikningum viðskiptavina bankanna í gegnum opin stöðluð þjónustuskil (e. Open API) án þess að sérstakur samningur sé til staðar á milli bankans og greiðsluvirkjandans og án þess að bankinn geti rukkað greiðsluvirkjandann sérstaklega fyrir þjónustuna. Einnig gerir PSD2 ráð fyrir að til verði samevrópskur markaður í greiðslum. Ef fjármálaeftirlit eins EES ríkis hefur veitt fyrirtæki réttindi sem greiðsluvirkjandi, veitir sú heimild fyrirtækinu rétt til að veita þjónustu hvar sem er innan EES.

Í ljósi þessara breytinga áforma fjölmörg fyrirtæki í heiminum að þróa farsímagreiðsluöpp sem nota þetta beina aðgengi að innlánareikningum neytenda. Fremst á meðal þeirra eru tækni- og netrisar á borð við Amazon Pay, AliPay, PayPal, GooglePay og ApplePay. Ef nýju farsímagreiðslulausnirnar, sem PSD2 opnar dyrnar fyrir, verða í vaxandi mæli erlendar þá skapar það aftur möguleikann á kerfislegri áhættu sem er sambærileg þeirri sem er til staðar við notkun greiðslukorta sem tengjast erlendu kortasamsteypunum. Þannig getur greiðsluapp eingöngu virkað ef til staðar er miðlægur hugbúnaður (þ.e. bakendakerfi) sem tryggir samskipti appsins við POSa, netverslanir, o.fl. Ef lokað er á virkni tiltekinna appa í bakendakerfinu er ekki hægt að greiða með þeim farsímum sem appið er í. Þessi staðreynd opnar aftur á möguleikann fyrir erlend stjórnvöld að beita tækni- og netrisunum fyrir sér við framkvæmd viðskiptaþvinganna.

Þótt að þetta sé allt saman fjarlægur möguleiki í dag að þá hefur þetta verið einn af þeim þáttum, sem hefur legið til grundvallar við þróun sameiginlegra farsímagreiðsluskema bankanna í Danmörku, Noregi og Svíþjóð. Í hverju landi fyrir sig er til eitt sameiginlegt farsímagreiðsluapp, sem byggir á innlánareikningum bankanna í viðkomandi landi. Byggð hafa verið upp sterk vörumerki og fyrirtæki í kringum öppin, sem neytendur og fyrirtæki í viðkomandi landi þekkja og treysta. Einnig hafa verið þróuð skýr greiðsluskema og öflug bakendakerfi sem halda utan um réttindi og skyldur neytenda, bankanna, verslana og tækniþjónustuveitanda í greiðsluferlinu. Loks hefur verið leitast við að tryggja að allar fjármálastofnanir í viðkomandi landi geti opnað á þennan greiðslumáta fyrir sína viðskiptavini óháð því hvort að þeir eru eigendur að fyrirtækinu sem stendur að baki appinu eða ekki.

1) https://www.theatlantic.com/international/archive/2014/04/visa-and-mastercard-russia/361361/2) Ýmsar kenningar hafa sést um það á netinu að Apple og Google geti nýtt sér „bakdyr“ inn í farsíma neytenda í gegnum stýrikerfi símanna til að  safna upplýsingum og jafnvel framkvæma breytingar í símanum. Þótt að slíkar bakdyr hafi verið nýttar til að safna upplýsingum um virkni símanna að þá hafa félögin hafnað því að verið sé að safna persónugreinalegum upplýsingum.  Þau hafa einnig mótmælt því að fullri hörku að þau myndu nokkurn tíman breyta innihaldi eða virkni símana án samþykki notandans.  Slík aðgerð myndi stórskaða traust almennings á vörum fyrirtækisins og hafa afar alvarlegar afleiðingar fyrir afkomu fyrirtækjanna.

Fréttir
06.10.2017

Aukin samvinna fjármálafyrirtækja

Með tilkomu nýrra laga um greiðsluþjónustu (PSD2) standa hefðbundnir bankar frammi fyrir því að tekjur þeirra af greiðsluþjónustu geti minnkað á sama tíma og þeir eiga það í hættu að fjarlægast viðskiptavini sína með tilkomu nýrra þátttakenda á markaði. Þessir nýju þátttakendur munu geta stillt sér upp sem milliliður á milli banka og hinna endanlegu notenda bankaþjónustunnar. Ef bankar bregðast ekki við gætu þeir smám saman breyst í „geymsluhólf“ fyrir fjármuni sem skapa lítinn virðisauka fyrir viðskiptavini.

Yfir 88% af stjórnendum evrópskra banka telja að PSD2 muni hafa áhrif á rekstur þeirra. Því hafa fölmargir evrópskir bankar ýtt úr vör ýmsum nýsköpunarverkefnum til að undirbúa sig undir PSD2. Um er að ræða nýsköpun sem snertir flest svið bankastarfseminnar, t.d.:

• Aukin samvinna banka á markaði.
• Endurnýjun tæknilegra innviða.
• Þróun nýrra afurða, þjónustu og þjónustuferla.
• Þróa net samstarfsaðila til að skapa aukinn virðisauka fyrir viðskiptavini bankanna.
• Grundvallarbreytingar á hinum hefðbundnu viðskiptamódelum banka.

Í þessum pistli verður eingöngu fjallað um aukna samvinnu banka en í Norður Evrópu hafa á undanförnum árum sprottið fram fjölmörg samstarfsverkefni banka sem hafa það markmið að gera neytendum mögulegt að nýta farsíma til að senda fjármuni sín á milli og til að greiða fyrir vöru og þjónustu í verslunum. Flestar þessara lausna hafa það sameiginlegt að bankar hafa með einum eða öðrum hætti stofnað til samstarfs til að setja upp nýjar greiðslurásir fyrir farsíma sem nýta innlánareikninga neytenda í stað greiðslukorta. Samstarfið hefur einnig náð til þróunar á farsímaforritum, vörumerkjum og reglum sem gilda um réttindi og skyldur banka, neytenda og verslana í greiðsluferlinu sem nýta þessar greiðslurásir.

Swish í Svíþjóð

Í desember 2012 var farsímagreiðslufyrirtækið Swish stofnað af SEB, Danske Bank, Handelsbanken, Länsförsäkringar Bank, Nordea, Swedbank og Sparbankerna. Swish var til að byja með eingöngu notað fyrir greiðslur á milli einstaklinga en í dag nota ríflega 5 milljónir Svía appið til að greiða einnig fyrir vöru og þjónustu í verslunum og netverslunum. Til að virkja þessa greiðsluleið þurfa neytendur eingöngu að nota BankID (sænska útgáfan af Auðkenni) til að skrá sig inn í appið og að velja þann bankareikning sem á að vera tengdur appinu og farsímanúmerinu. Neytendur geta síðan millifært með símanúmerinu einu saman eða greitt í verslunum. Neytendur greiða ekkert fyrir notkun lausnarinnar en verslanir greiða um 1,5-2 SEK (ca 24-30kr) fyrir hverja færslu.

MobilePay í Danmörku

Árið 2012 hófu danskir bankar samstarf um þróun á sameiginlegri farsímagreiðslulausn sem byggði á innlánareikningum. Í árslok sama ár hætti Danske Bank þátttöku í samstarfinu og kynnti, í maí 2013, eigin farsímagreiðslulausn, MobilePay, sem nýtir greiðslurásir kortaskema til að miðla greiðslum. Ákvörðun Danske Bank að byggja sína eigin lausn á kortakerfinu og að markaðssetja hana undir merkjum MobilePay reyndist farsæl enda tókst þeim þannig að vera fyrstir á markað. MobilePay náð hratt mikilli útbreiðslu jafnt hjá viðskiptavinum Danske Bank sem og hjá viðskiptavinum annarra banka þar sem hægt var að tengja appið við greiðslukort frá hvaða banka sem var í Danmörku. Í dag er MobilePay með 3,6 milljónir notenda.

Þrátt fyrir útgáfuna á MobilePay þá héldu hinir dönsku bankarnir sínu striki og kynntu sína útgáfu af greiðslulausn í júní 2013. Um var að ræða tæknilega greiðslurás sem hver og einn banki gat tengt við sitt app. Þessi greiðslulausn náði aldrei flugi enda ruglaði það neytendur í ríminu að hún skyldi markaðssett undir mismunandi merkjum yfir 70 banka. Einnig gekk hægt og erfiðlega að samþætta lausnina inn í öpp bankanna.

Í ljósi þessa afleita árangurs stofnuðu samkeppnisaðilar Danske Bank, Swipp í ágúst 2014, sjálfstætt vörumerki og app sem neytendur gátu sótt í AppStore og Google Play. Swipp appið varð loks aðgengilegt í ágúst 2015, en þá var á brattann að sækja í samkeppninni við MobilePay sem var komið með yfirburðar stöðu á markaðnum með hátt í þriðja milljón notenda. Swipp gekk hins vegar ágætlega í markaðssókn sinni. Í október 2016 var Swipp komið með 1 milljón notenda og um 28 þúsund verslanir tóku við Swipp greiðslum sem voru álíka margar verslanir og MobilePay hafði náð í viðskipti á þremur árum.

Það sem keyrði vinsældir Swipp áfram var að lausnin var mun hagkvæmari greiðslumáti fyrir verslanir en MobilePay. Einnig tryggði Swipp verslunum rauntímaaðgengi að fjármunum og hægt var að greiða með farsímanum á hefðbundnum POSa. MobilePay kallaði hins vegar á að settur væri upp viðbótarbúnaður í verslunum svo kassarnir gætu tekið á móti greiðslum og það sem meira var þá byggði MobilePay á kortakerfinu þannig að verslunareigendur fengu ekki strax aðgengi að greiðslunum.

Í október 2016 ákváðu Danske Bank og Nordea að slíðra sverðin með samningi sem fól í sér að MobilePay yrði sett í sér fyrirtæki og að Nordea myndi flytja sína notendur frá Swipp til MobilePay. Í framhaldinu var samstarfinu um Swipp sjálfhætt, enda eru þessir tveir bankar með um 70% markaðshlutdeild á viðskiptabankamarkaði í Danmörku og hafa nú allir bankar í Danmörku flutt sig til MobilePay.

Ástæða þess að bankarnir í Danmörku ákváðu að sameinast um eina lausn var að þeir stóðu frammi fyrir því að geta barist sín á milli um danska neytendur næstu tvö árin eða að hefja samvinnu til að undirbúa sig undir aukna samkeppni við tæknirisana Apple, Google, Amazon, í kjölfar innleiðingu á PDS2 löggjöfinni. MobilePay varð einfaldlega fyrir valinu þar sem það var mun sterkara vörumerki en Swipp. Hins vegar þurfti MobilePay að skuldabinda sig samhliða breytingunni til þess að flytja MobilePay appið af greiðslurásum kortaskemanna yfir á nýjar og hagkvæmari greiðslurásir sem myndu byggja á innlánareikningum bankanna, þ.e.a.s. lausn sem væri í raun sambærileg Swipp lausninni.

Vipps í Noregi

Í framhaldi af samkomulagi danskra banka um að nota MobilePay, hófu norskir bankar að ræða saman um möguleikann á því að sameinast um eina farsímagreiðslulausn sem myndi byggja á innlánakerfum bankanna. Í febrúar 2017 var tilkynnt að þeir hyggðust sameinast um að nota lausn DnB bankans, Vipps, og að hún yrði sett í sér fyrirtæki og að bankarnir yrðu allir eignaraðilar að fyrirtækinu. Vipps var ein af mörgum norskum lausnum sem var í notkun fyrir þessa ákvörðun, en Vipps hafði náð mestri útbreiðslu af þeim lausnum sem voru í boði. Í samtali við norska blaðamenn sagði Rune Bjerke forstjóri DnB að megin ástæða fyrir samkomulaginu væru fyrirsjáanlegar breytingarnar sem PSD2 myndi hafa á greiðslumarkaðnum á næstu árum. Til að mæta alþjóðlegri samkeppni þyrftu norskir bankar að vinna saman að því að búa til innviði fyrir farsímagreiðslur sem neytendur treystu.

Samvinna banka yfir landamæri

Samvinna banka vegna breytinga sem munu fylgja PSD2 er ekki takmörkuð við Norðurlöndin. Þannig hafa hollenskir og belgískir bankar sameinað krafta sína og eru þessa dagana að þróa lausn, Payconiq, sem verður hægt að nota jöfnum höndum í báðum löndunum. Þetta er fyrsta dæmið um farsímagreiðslulausn, sem mér er kunnugt um, sem verður hægt að nota til að greiða í fleiri en einu landi.

Líklegt verður að telja að þróunin verði sambærileg í öðrum ríkjum innan EES og að smám saman verði til alþjóðleg farsímagreiðslulausn sem tryggir að hægt verði að senda peninga á milli einstaklinga og hægt verði að greiða með símanum fyrir vöru og þjónustu á POSa. Lykillinn að því er einhvers konar evrópskur samskráningargrunnur þar sem farsímanúmer er tengt við innlánareikning neytanda, sem tryggir að neytandi geti tekið á móti greiðslum frá þriðja aðila eða borgað fyrir vöru og þjónustu nærri því hvar sem er innan EES.

Íslenskur samkeppnisréttur sækir um margt fyrirmynd til samkeppnisreglna Evrópusambandsins. Meðal þess sem þó greinir á milli er að í samkeppnisrétti annarra landa er víða ekki að finna ákvæði um að samkeppnisaðilar, t.d. á Norðurlöndunum, þurfi ekki sækja um samþykki samkeppnisyfirvalda fyrir samstarfi á markaði, heldur er það sett á þeirra herðar að tryggja að samstarfið uppfylli skilyrði slíks samstarfs. Þannig er það t.a.m. á ábyrgð fyrirtækjanna sjálfra að tryggja að ávinningur neytanda sé verulegur af slíku samstarfi og að samstarfið skaði ekki samkeppni. Íslensk samkeppnislög gera hins vegar ráð fyrir því að sótt sé fyrirfram um undanþágu fyrir samstarfi frá ákvæðum samkeppnislaga um samvinnu fyrirtækja og samtaka fyrirtækja. Slíkt ferli getur verið tímafrekt sem leiðir til þess að hugmyndir sem gætu skapað ávinning fyrir íslensk fyrirtæki og neytendur komast aldrei í umræðu, hvað þá þróun, og verða því aldrei að veruleika.

Blogg
26.09.2017

Aparnir og fjármálakerfi morgundagsins!

Ör framþróun í tækni og markvissar aðgerðir stjórnvalda víðsvegar í Evrópu til að opna fjármálamarkaði munu leiða til mikillar grósku og nýsköpunar í fjármálaþjónustu á komandi árum. Þessar breytingar munu gerbylta hvernig viðskiptavinir nota fjármálaþjónustu, hvernig hún er veitt og hvaða aðilar koma til með að geta veitt slíka þjónustu.

Fréttir
19.09.2017

Kapphlaupið um gögnin

Í athyglisverðri grein sem birtist nýverið í tímaritinu Economist var því haldið fram að gögn séu orðin verðmætustu auðlindir hagkerfisins í dag og séu í raun olía tuttugustu og fyrstu aldar. 

Fréttir
14.09.2017

Aukin neytendavernd með nýjum persónuverndarlögum

Ný persónuverndarlög, GDPR (General Data Protection Regulagion) taka gildi 25. maí 2018. Stefnt er að því að lögin taki gildi á sama tíma á Íslandi.

Fréttir
12.09.2017

Nýir þátttakendur á fjármálamarkaði

Á næsta ári taka gildi innan ESB ný lög um greiðsluþjónustu (e. PSD2) sem munu koma til með að hafa byltingarkennd áhrif á markaðinn. Fyrirhugað er að innleiða tilskipunina í íslensk lög á komandi ári. Með nýju lögunum, PSD2, er verið að aðgreina á milli framleiðslu og dreifingu fjármálaþjónustu.

Blogg
06.09.2017

Fjármálamarkaðurinn fyrir og eftir ný lög um greiðsluþjónustu

Ný samevrópsk löggjöf um greiðsluþjónustu, PSD2, mun hafa mikil áhrif á fjármálafyrirtæki, verslanir og neytendur. Fjallað var um löggjöfina í öðrum pistli (sjá hér) en markmiðið með þessum pistli er að skoða hin praktísku áhrif sem löggjöfin mun hafa á markaðinn með tveimur dæmum.

Blogg
29.08.2017

Ísland - ekki lengur eyland á fjármálamarkaði

Á næstu fimm árum mun fjármálaþjónusta á Íslandi, og þá sérstaklega starfsemi viðskiptabanka, taka stakkaskiptum með tilkomu nýrra fjártæknilausna, nýrra viðskiptamódela í fjármálaþjónustu og nýrra samevrópskra laga um fjármálaþjónustu.  Þessar breytingar munu leiða til þess að þátttakendum á íslenskum fjármálamarkaði mun fjölga.

Fréttir
12.06.2017

RB Classic fór fram um helgina

RB Classic hjólreiðakeppnin fór fram um helgina í blíðskaparveðri. Yfir 250 manns tóku þátt í mótinu sem einkenndist af krafti og gleði.  Myndir segja meira en 1000. Kíkið líka á facebook síðu RB Classic.

Takk fyrir okkur!

Fréttir
08.06.2017

RB Classic 2017

RB í samstarfi við hjólreiðafélagið Tind, Cintamani og hjólreiðaverslunina Kríu stendur fyrir götuhjólakeppni umhverfis Þingvallavatn laugardaginn 10. júní, 2017. Metskráning er í ár með 215 hjólreiðafólki sem hefur skráð sig til leiks og verður skemmtilegt að fylgjast með keppninni á laugardaginn og sjá okkar fremsta fólk í hjólreiðum spreyta sig á þessari áhugaverðu leið en 10 km af leiðinni er á möl. 

Fréttir
23.05.2017

Upptökur af fyrirlestrum frá Vorráðstefnu RB

Miðvikudaginn 10. maí fór fram Vorráðstefna RB undir heitinu "The Digitalization of the Financial Sector". Ráðstefnan var mjög vel sótt og margt mjög áhugavert kom fram um  hvernig viðskiptamódel banka hafa verið að þróast og munu þróast á næstunni.

Stemningin

Hér má sjá fyrlestrana sem fluttir voru á ráðstefnunni.

Fyrirlestrar

Blogg
26.04.2017

Stjórnun upplýsinga í alvarlegum atvikum

Eitt það mikilvægasta í stóratvikastjórnun er að sjá til þess að allir sem þurfa séu upplýstir frá upphafi til enda. Þetta er einnig sá hluti sem er hvað viðkvæmastur og erfiðastur að útfæra fyrir alla þá sem að ferlinu koma. Major incident manager RB (hér eftir MIM) léttir þessari upplýsingaskyldu að miklu leyti af þeim sem vinna að lausn og hlífir þeim við stöðugu áreiti frá viðskiptavinum og yfirstjórn. Á sama tíma þarf MIM alltaf að vera upplýstur um stöðuna til að geta veitt upplýsingum áfram viðeigandi aðila.

Fréttir
12.04.2017

RB skrifar undir samstarfsyfirlýsingu við Virk

RB skrifaði nýlega undir samstarfsyfirlýsingu við Virk, vegna þróunarverkefnis um innleiðingu á verkferlum tengdum endurkomu til vinnu eftir veikindi eða slys. Hlutverk Virk er að efla starfsgetu einstaklinga í kjölfar veikinda eða slysa með árangursríkri starfsendurhæfingarþjónustu.

RB er stolt af því að taka þátt í þessu þróunarverkefni, telur það falla vel að stefnu sinni um samfélagslega ábyrgð og hvetur jafnframt önnur fyrirtæki til þess sama.

Á myndinni eru Herdís Pála Pálsdóttir framkvæmdastjóri Mannauðs- og markaðsstjórnar RB og Þorsteinn Sveinsson frá Þjónustu- og mannauðssviði Virk

Viðburðir
16.03.2017

Vorráðstefna RB 2017

Taktu frá 10. maí 2017 og mættu í Hörpu á einstaklega spennandi ráðstefnu, THE DIGITALIZATION OF THE FINANCE SECTOR, um upplýsingatækni og fjármálaþjónustu framtíðarinnar.

Fréttir
13.02.2017

RB og FKA í samstarf um að efla hlut kvenna í tæknigeiranum

Gengið hefur verið frá samkomulagi um að RB gerist velunnari Félags kvenna í atvinnulífinu, FKA, en hlutverk félagsins er að efla tengslanet og styðja kvenleiðtoga til að sækja fram og sameina þá.

Fréttir
08.02.2017

RB á Framadögum 2017

Framadagar fara fram fimmtudaginn 9. febrúar í Háskólanum í Reykjavík, HR. Við verðum að sjálfsögðu með bás þar sem hressir starfsmenn standa vaktina og upplýsa nemendur um starfsemina og svara spurningum.

Fréttir
02.02.2017

Fyrirlestur frá RB á UTmessunni 2017

UTmessan fer fram á föstudag og laugardag, 3.-4. febrúar, í Hörpu. Á föstudeginum er ráðstefnudagur en á laugardeginum er sýningardagur opinn öllum. Ásgeir Logi Ísleifsson atvikastjóri hjá RB mun á ráðstefnudeginum vera með fyrirlestur undir yfirskirftinni Stóratvikastjórnun hjá RB.

Fréttir
20.01.2017

RB er Framúrskarandi fyrirtæki

Í byrjun þessa mánaðar bárust okkur skemmtilegar fréttir um að RB er á lista Creditinfo yfir Framúrskarandi fyrirtæki á Íslandi 2016. Aðeins 1,7% íslenskra fyrirtækja standast þau skilyrði sem sett eru. Við erum afar ánægð með þessa viðurkenningu.

Fréttir
31.12.2016

Tafir við áramótavinnslur

Vegna tafa við áramótavinnslur hjá Reiknistofu bankanna geta gögn um reikningsyfirlit sem send eru í netbanka viðskiptavina verið seint á ferðinni.

Fréttir
05.12.2016

RB hlýtur Gullmerki Jafnlaunaúttektar PwC

RB hefur hlotið Gullmerki Jafnlaunaúttektar PwC, en með því er staðfest að munur á grunn- og heildarlaunum karla og kvenna er minni en 3,5% hjá fyrirtækinu. 

Fréttir
22.11.2016

Breytt staðsetning - Örráðstefna um MiFID II

Vegna góðrar þátttöku ákváðum við að færa örráðstefnuna "Allt það helsta um MiFID II" sem fram fer fimmtudaginn 24. nóvember næst komandi kl. 13:00 út úr húsi (húsakynnum RB) í Hörpuna.

Blogg
17.11.2016

ITIL Major Incident Management

Hvað er Major incident og Hvenær verður incident að Major incident?

Fréttir
21.10.2016

RB hjálpar

Fyrr á þessu ári mótaði RB sér formlega stefnu í samfélagsábyrgð og er nú unnið markvisst að innleiðingu hennar. Sem hluti af henni fer núna í loftið verkefni sem heitir “RB hjálpar”.

Fréttir
07.10.2016

Forritarar framtíðarinnar fá styrk frá Google

Bjóða 224 íslenskum stelpum á aldrinum 8-13 ára á forritunarnámskeið

Í tengslum við evrópsku forritunarvikuna Europe Code Week sem fram fer 15.–23. október næstkomandi hefur sjóðurinn Forritarar framtíðarinnar hlotið styrk frá Google til að kveikja áhuga á forritun hjá stelpum.

Fréttir
04.10.2016

14 grunnskólar styrktir um 12 milljónir

Forritarar framtíðarinnar efla tækni- og forritunarkennslu í grunn- og framhaldsskólum

Úthlutað hefur verið styrkjum úr sjóðnum Forritarar framtíðarinnar fyrir árið 2016. Sjóðnum bárust um 30 umsóknir í þessari úthlutun, flestar frá grunnskólum. Sjóðnum var kosin ný stjórn á aðalfundi sem fram fór fyrir helgi.

Fréttir
27.09.2016

Nýtt skipulag hjá RB

Nýtt skipulag innleitt til að fylgja eftir stefnubreytingu.

Nýtt skipulag mun taka gildi 1. október næstkomandi hjá RB og er það í kjölfar endurskoðaðrar stefnu félagsins, segir Friðrik Þór Snorrason, forstjóri RB.

Fréttir
19.09.2016

Góðgerðarleikar Sidekick í RB

Föstudaginn 16. september hófust góðgerðarleikar Sidekick hér í RB. Um er að ræða þriggja vikna heilsuáskorun fyrir starfsfólk RB. Starfsfólk safnar stigum eða svo kölluðum “Kicks” í Sidekick appinu fyrir að framkvæma heilsueflandi hluti eins og að drekka vatn, borða ávexti, alls konar æfingar (t.d. armbeygjur, hnébeygjur, planka), taka stigann og slaka á með slökunaraðferðum.

Fréttir
30.08.2016

Vel heppnað RB Classic

RB (Reiknistofa bankanna) hélt í samstarfi við hjólreiðafélagið Tind og Kríu hjólaverslun götuhjólakeppni umhverfis Þingvallavatn síðasta laugardag, 27. ágúst 2016. Ræst var við Útilífsmiðstöð skáta Úlfljótsvatni og hjólað umhverfis Þingvallavatn. Hægt var að velja á milli tveggja vegalengda, 127 km (2 hringir - A flokkur) og 65 km (1 hringur - B flokkur). Stærstur hluti leiðarinnar var hjólaður á malbiki en 10 km á möl.

Fréttir
18.07.2016

RB í frétt á erlendri vefsíðu

BAI birti nýlega grein um áhrif laga og reglna á kröfur markaða um að hraða greiðslumiðlun.Í greininni er sagt frá RB...

Fréttir
30.06.2016

12 milljónir veittar í styrki til skóla

Búið er að ákveða úthlutun fyrir árið 2016 úr sjóðnum Forritarar framtíðarinnar en RB er stoltur Hollvinur og annar stofnandi sjóðsins.

Fréttir
09.06.2016

Fréttabréf RB júní 2016

Þá er komið að stútfullum fréttapakka frá okkur í RB.

Fréttir
01.06.2016

Team RB í Wow Cyclothon 2016

Við kynnum með stolti TEAM RB sem mun taka þátt í Wow Cyclothon 2016.

Fréttir
31.05.2016

Myndbönd frá ráðstefnu RB

Miðvikudaginn 4. maí fór fram ráðstefna RB, “Sú kemur tíð”. Ráðstefnan tókst frábærlega og mættu hátt í 400 manns í Hörpuna til að hlusta á erindi um Big Data, Digital Banking, Fintech, BPM, Internet of me, Hackathon, útvistun, stöðlun, skilvirkni o.fl.

Fréttir
23.05.2016

RB tekur þátt í Fintech partýi Arion banka

Í Fintech partýi Arion banka, sem fram fer 3. og 4. júní 2016, býður RB upp á aðgengi að aðgerðum (API) sem sérstaklega eru hugsaðar til að styðja við mobile þróun af ýmsu tagi og auðga hefðbundna greiðsluvirkni sem hefur að mestu verið óbreytt á liðnum áratugum.

Blogg
22.04.2016

Að miðla þekkingu - DB2 Got Talent 2016

Fyrir fáeinum vikum síðan tók ég þátt í fyrirlestra-keppni á netinu sem bar yfirskriftina “DB2 Got Talent 2016” og fólst í því að keppendur fengu 7 mínútur til að koma frá sér afmörkuðu efni sem það hefur öðlast reynslu af og dýpri þekkingu á í tengslum við vinnu þeirra á DB2 gagnagrunninum, hvort sem um er að ræða DB2 á Linux Unix Windows (LUW) umhverfinu eða á stórtölvu (Mainframe z/OS). 

Fréttir
18.04.2016

Aðalfundur RB 2016

Aðalfundur Reiknistofu bankanna hf. (RB) verður haldinn miðvikudaginn 20. apríl 2016 í fundarsal RB, Höfðatorgi, Katrínartúni 2, Reykjavík og hefst fundurinn kl. 16:15.

Viðburðir
12.04.2016

Sú kemur tíð

Ráðstefna um upplýsingatækni og fjármálaþjónustu framtíðarinnar miðvikudaginn 4. maí 2016 í Hörpu.

Viðburðir
01.04.2016

Hugvekja um nýsköpun í fjármálastarfsemi

Skráðu þig á spennandi morgunverðarfund fimmtudaginn 14. apríl milli klukkan 8:45 og 10:15.

Um er að ræða “hugvekju” um það hvernig fjármálastarfsemi er að breytast með tilliti til nýsköpunar.

Fréttir
23.03.2016

RB er fyrirmyndarfyrirtæki í góðum stjórnarháttum

Þriðjudaginn 15. mars var RB veitt viðurkenning við hátíðlega athöfn í Háskóla Íslands fyrir að vera fyrirmyndarfyrirtæki í góðum stjórnarháttum.  Viðurkenningin er veitt af Rannsóknarmiðstöð um stjórnarhætti við Háskóla Íslands.  Samstarfsaðilar rannsóknarmiðstöðvarinnar eru Viðskiptaráð Íslands, Nasdaq og Samtök atvinnulífsins.

Fréttir
17.03.2016

RB ræður framkvæmdastjóra fjármálasviðs

Ingibjörg Arnarsdóttir tók við starfi framkvæmdastjóra Fjármálasviðs hjá RB þann 7. mars 2016. Hún hefur víðtæka reynslu af stjórnun fyrirtækja, fjármála, upplýsingatækni og stjórnarsetu.

Fréttir
15.03.2016

RB tilnefnt til íslensku þekkingarverðlaunanna

Þrjú fyrirtæki eru tilnefnd til Íslensku þekkingarverðlaunanna en það eru Reiknistofa bankanna, Kolibri og Íslandsbanki.

Fréttir
11.02.2016

Vinningshafinn í 100% Framadagaleiknum

Þá er búið að draga út vinningshafa í 100% Framadagaleiknum okkar. Vinningshafinn er Arnþór Gíslason nemandi í rafmagnstæknifræði.

Fréttir
09.02.2016

RB á Framadögum í HR

Við verðum á Framadögum í HR miðvikudaginn 10. febrúar milli klukkan 11 og 16. Það er um að gera að kíkja við í básnum okkar og taka þátt í skemmtilegum leik. Þú gætir unnið Beats Solo2 þráðlaus heyrnartól að verðmæti 47.990 kr.

Fréttir
08.02.2016

RB semur við DalPay

Það er sönn ánægja að segja frá því að DalPay hefur bæst í viðskiptavinahóp RB.

Dalpay hefur síðan 2006 boðið uppá þjónustu við aðila sem vilja selja vörur sínar á veraldarvefnum. DalPay brúar þannig bilið á milli seljenda og kaupenda, hvar sem er í heiminum, fyrir tilstilli veraldarvefsins. Samstarfið við RB felur í sér notkun á samskráningagrunni RB (PAR RB).

Fréttir
15.01.2016

RB annáll 2015

2016 er gengið í garð og við hjá RB horfum spennt fram á veginn, enda reiknum við með viðburðaríku og velheppnuðu ári. Það er ekki bara af því að við erum að eðlisfari bjartsýn (sem við erum), heldur lærum við líka af sögunni og 2015 var einstaklega gott ár.

Fréttir
18.12.2015

Starfsfólk RB safnaði peningum handa flóttafólki í desember

Starfsfólk RB lét gott af sér leiða í desember með því að safna peningum handa flóttafólki.  Alls söfnuðust 162.000 krónur og var upphæðin afhent Rauða krossinum sem sér síðan um að koma peningunum áfram til þeirra sem þurfa á að halda.  Ákveðið var að safna pening handa flóttafólki enda þörfin brýn miðað við ástandið í heiminum í dag.

Fréttir
16.11.2015

SideKick heilsuæði í RB

Fyrir rúmri viku síðan, föstudaginn 6. nóvember, tók RB í notkun app fyrir starfsfólk sitt sem hefur það markmið að efla heilsu og vellíðan starfsólks. Appið nefnist SideKick en það byggir á sterkum vísindagrunni og klínískri reynslu. Um er að ræða einfalda leikjavædda lausn sem gerir heilsueflingu skemmtilega og aðgengilega með það að markmiði að ná fram varanlegum lífstílsbreytingum.

Blogg
11.11.2015

Um jólagjafir vinnustaða

Þessa dagana hrúgast inn jólagjafahugmyndirnar til fyrirtækja landsins frá hinum ýmsu söluaðilum. Þá hefjast heilaumbrotin miklu hjá hinum útvöldu sem fá það „vinsæla“ hlutskipti að finna jólagjöfina í ár fyrir starfsfólkið. Þetta er klárlega fyrsti forboði jólanna og við færumst sífellt framar í dagatalinu með jólaundirbúninginn. Stundum verður þetta til þess að einhver á skrifstofunni fer að humma jólalög á þessum annars ótímabæra tíma ársins, sem er bara hressandi!

Fréttir
09.11.2015

RB fyrsta fyrirtækið til að taka upp íslenska leikjavædda heilsueflingu

Heilbrigðisfyrirtækið Sidekick Health sem á í samstarfi við MIT, Harvard og virtasta spítala Bandaríkjanna hefur þróað heilsulausn fyrir fyrirtæki.

Starfsfólk RB mun á næstunni fá tækifæri til að sameina heilsueflingu og leik á vinnutíma. RB hefur gert samning við íslensk-sænska heilbrigðisfyrirtækið Sidekick Health um kaup á nýrri vöru fyrirtækisins. Varan nefnist Sidekick og innifelur meðal annars app sem eflir heilsu og vellíðan starfsfólks.

Viðburðir
16.10.2015

RB SQUARE

RB býður þér á Off Venue viðburð á Airwaves, RB SQUARE, föstudaginn 6. nóvember í glerskálanum í Höfðatorgi. 

Viðburðir
14.10.2015

Sameining öryggisstjórnkerfa: Reynslusaga frá samruna RB og Teris

Spennandi morgunverðarfundur í nóvember.

Í byrjun árs 2012 keypti RB stærstan hluta eigna upplýsingatæknifyrirtækisins Teris og voru fyrirtækin í kjölfarið sameinuð.

Við samruna þarf að taka á mörgum áskorunum s.s. samþættingu fyrirtækjamenningar, lausnaframboðs, gæðakerfis o.fl.

Fréttir
06.10.2015

11 milljónir veittar í styrki til skóla

Forritarar framtíðarinnar efla tækni- og forritunarkennslu í grunn- og framhaldsskólum.

Þriðjudaginn 6. október verða styrkir úr sjóðnum Forritarar framtíðarinnar afhentir fyrir árið 2015. Sjóðnum bárust alls 42 umsóknir í þessari úthlutun, flestar frá grunnskólum. Virði styrkjanna er samtals ríflega ellefu milljónir króna. Styrkirnir eru í formi tölvubúnaðar og þjálfunar kennara til forritunarkennslu fyrir nemendur.

Fréttir
30.09.2015

Fréttabréf RB september 2015

Í fréttabréfi RB í september mánuði gætir ýmissa grasa og má þar meðal annars finna upplýsingar um spennandi morgunverðarfund, frétt um nýjan ytri vef, nýtt RB blogg, frétt um RB Classic, fjölskyldudag RB og hina hliðina á starfsfólki RB.

Fréttir
28.09.2015

Hvernig finnst þér nýi vefurinn okkar?

Í dag fór nýr ytri vefur RB í loftið.  Vefurinn er unninn í samstarfi við Skapalón og er hugmyndin á bak við hann sótt í nýtt markaðsefni RB.  Myndefni og skilaboð tengjast alls kyns útivist, aðstæðum þar sem allt þarf að vera 100% til að ganga upp.  Þetta er íslensk tenging, þar sem gildin okkar fagmennska, öryggi og ástríða þurfa að spila saman.  Nýtt kynningarefni var unnið í samstarfi við auglýsingastofuna Árnasyni.

Blogg
28.09.2015

Þróun á nýju kerfi er langhlaup

Undanfarna mánuði hef ég ásamt vinnufélögum mínum og samstarfsaðilum unnið að því að þróa stórt tölvukerfi, sem taka á við mörgum af mikilvægustu verkefnum fjármálakerfisins á Íslandi. Stundum gengur allt eins og í sögu, allir eru glaðir í bragði og vissir um góðan árangur. Stundum er svo eins og allt gangi á afturfótunum.  „Hinir“ eru allir að gera eitthvað vitlaust og trúin á að við munum ljúka verkefninu á réttum tíma brestur.

Fréttir
25.09.2015

ERT ÞÚ TIL Í 100% ÁSKORANIR?

TAKTU ÞÁTT Í AÐ MÓTA KRAFTMIKIÐ OG LIFANDI UPPLÝSINGATÆKNIFYRIRTÆKI.

Okkar æðsta markmið er að veita viðskiptavinum okkar 100% uppitíma og það gerum við með því að hafa í okkar röðum tæknifólk í fremstu röð. Einstaklinga sem við treystum fyrir lyklinum að mikilvægustu upplýsingakerfum landsins. Fáir uppfylla þau skilyrði. Getur verið að þú gerir það?

Fréttir
02.09.2015

Metþátttaka á RB Classic mótinu

RB (Reiknistofa bankanna) hélt í samstarfi við hjólreiðafélagið Tind; Ion Luxury Hótel og Kríu hjólaverslun götuhjólakeppni umhverfis Þingvallavatn síðasta sunnudag, 30. ágúst 2015. Ræst var við ION hótel og hjólað réttsælis umhverfis Þingvallavatn. Hægt var að velja á milli tveggja vegalengda, 127 km (2 hringir - A flokkur) og 65 km (1 hringur - B flokkur). Stærstur hluti leiðarinnar var hjólaður á malbiki en 10 km á möl.

Fréttir
27.08.2015

Allt um RB Classic 2015

RB (Reiknistofa bankanna) mun í samstarfi við hjólreiðafélagið Tind; Ion Luxury Hótel og Kríu hjólaverslun standa fyrir götuhjólakeppni umhverfis Þingvallavatn sunnudaginn 30. ágúst 2015.  Ræst verður við ION hótel og hjólað réttsælis umhverfis Þingvallavatn. Leiðin liggur um ægifagra náttúru Þingvalla og nágrennis.

Fréttir
11.06.2015

RB semur við Data eXcellence um gagnaflutninga og mótun gagna (Data Migration)

Í janúar samdi RB um endurnýjun helstu grunnkerfa sinna við hugbúnaðarfyrirtækið Sopra Banking Software. Í slíkum uppfærsluverkefnum er gagnaflutningur og mótun gagna (e. „Data Migration") iðulega mjög áhættusamur þáttur og því er mjög mikilvægt að vel sé staðið að þeim málum og dregið úr áhættu við þau eins og kostur er.

Fréttir
09.06.2015

RB ræður framkvæmdastjóra tæknireksturs og þjónustu

RB (Reiknistofa bankanna hf.) hefur gengið frá ráðningu Magnúsar Böðvars Eyþórssonar í starf framkvæmdastjóra sviðsins Tæknirekstur og þjónusta. Hann hóf störf hjá félaginu í maí mánuði.

Fréttir
05.06.2015

Vel heppnað golfmót

Í gær fór fram stórskemmtilegt golfmót, RB Invitational, þar sem viðskiptavinir og starfsfólk RB kom saman og spiluðu golf. Mótið fór fram á Hvaleyrarvellinum hjá Golfklúbbnum Keili í Hafnarfirði. Spilað var Texas Scramble með fjóra í hverju holli.

Fréttir
29.05.2015

Starfsmannafélag RB (SRB) 40 ára

Miðvikudaginn 27. maí fagnaði starfsmannafélag RB (SRB) stórum áfanga en þá varð félagið 40 ára. Af því tilefni bauð SRB í heljarinnar grillveislu og kökur í glerskálanum í Höfðatorgi.

Fréttir
19.05.2015

Vegna leiðréttingar verðtryggðra fasteignalána

Í ljósi umfjöllunar í fjölmiðlum í dag um leiðréttingu verðtryggðra fasteignalána vill Reiknistofa bankanna (RB) koma því á framfæri að félagið vinnur að breytingum á útlánakerfi RB í góðri samvinnu við viðskiptavini.  Um er að ræða viðamikla og flókna breytingu á kerfum félagsins.

Fréttir
09.04.2015

Fréttabréf RB - apríl 2015

Nýtt fréttabréf RB er komið út.

Blogg
08.04.2015

Persónuleg samskipti

Í síðustu viku sendi átta ára sonur minn mér sms klukkan sjö um morgun úr næsta herbergi og bað mig um að finna föt á sig.  Við vitum að nánast heil kynslóð er hætt að tala saman í síma og flest samskipti fara fram í rafrænu formi.  Það sem ég velti fyrir mér er á hvaða hátt hefur þetta áhrif á okkur dags daglega bæði í okkar persónulega lífi og vinnutengt.  Erum við almennt orðin feimnari við að hringja í fólk og hitta það eða þykir það orðið of persónulegt að hringja beint í gsm síma hjá viðskiptavinum okkar og tengiliðum ?   Sjálf hef ég reynt að leggja upp úr því að þekkja mína tengiliði persónulega og reyni heldur að hringja beint í þá og hitta í kaffi til að ræða málin.

Fréttir
27.03.2015

RB styrkir Hjólakraft

RB hefur ákveðið að leggja Hjólakrafti lið með peningaframlagi.  Hjólakraftur er verkefni sem var sett í gang árið 2012 og hefur verið í gangi síðan þá. Verkefnið snýst um að búa til létt og skemmtilegt prógramm fyrir krakka og unglinga sem vilja tilheyra skemmtilegum hópi sem hefur aukna hreyfingu, uppbyggileg samskipti og heilbrigði að leiðarljósi.

Fréttir
19.03.2015

Hefur unnið með Mainframe tölvur í yfir 30 ár

Í vor varð Stórtölvan IBM Mainframe 50 ára en slíkar tölvur eru hjartað í 90% tölvukerfa hjá 500 stærstu fyrirtækjum Bandaríkjanna, Fortune 500. Í tilefni afmælisins tók Nýherji lauflétt viðtal við okkar mann, Bjarna Ómar Jónnsson tækniarkitekt, en hann hefur unnið með Mainframe tölvur í yfir 30 ár.  Viðtalið birtist á Youtube síðu Nýherja.

Fréttir
06.03.2015

Við leitum að öflugum framkvæmdastjóra

Við leitum að stjórnanda til að leiða sviðið Tæknirekstur og þjónusta sem er ábyrgt fyrir hönnun á tæknilegum innviðum og rekstri þjónustulausna fyrirtækisins, sem sérsniðnar eru að þörfum fjármálamarkaðar. Okkar megin markmið er að tryggja viðskiptavinum 100% uppitíma og það gerum við með því að hafa í okkar röðum öflugt fólk sem treyst er fyrir lyklunum að mikilvægustu upplýsingatæknikerfum landsins.

Viðburðir
26.02.2015

AngularJS

Skráðu þig á spennandi morgunverðarfund um AngularJS. AngularJS er "javascript framework" sem auðveldar forritun á framendalausnum.  Um er að ræða "open source project" sem er viðhaldið af Google. AngularJS hefur á skömmum tíma náð mikilli útbreiðslu og er að verða eitt vinsælasta tólið til að búa til falleg og notendavæn viðmót á vefsíðum.

Fréttir
09.02.2015

Spennandi morgunverðarfundur um AngularJS

Fimmtudaginn 26. febrúar verður haldinn spennandi morgunverðarfundur um AngularJS í höfuðstöðvum RB í Höfðatorgi, Katrínartúni 2, á 4. hæð, milli klukkan 8:30 og 10:00.

Fréttir
13.01.2015

Ný grunnkerfi RB einfalda vöruþróun og stuðla að sparnaði innan bankakerfisins

Reiknistofa bankanna hf. (RB) hefur samið um endurnýjun helstu grunnkerfa sinna við hugbúnaðarfyrirtækið Sopra Banking Software. Um er að ræða umfangsmikið verkefni sem nær til innlána- og greiðslukerfa RB þar sem gömlum sérhönnuðum kerfum er skipt út fyrir staðlaðar alþjóðlegar hugbúnaðarlausnir. Markmið endurnýjunarinnar er að auka hagræði og draga úr kostnaði við rekstur upplýsingakerfa bankanna. Kerfin koma einnig til með að auðvelda vöruþróun og flýta fyrir innleiðingu nýrrar þjónustu bankanna. Nú þegar hafa Landsbankinn og Íslandsbanki samið við RB um notkun nýju kerfanna og þar með er framgangur verkefnisins tryggður.

Fréttir
13.01.2015

Ef þú ert lífsglaður þjónustulundaður einstaklingur þá langar okkur að bjóða þér um borð

Við leitum eftir metnaðarfullum einstaklingi sem geislar af lífsgleði og hefur ánægju af því að veita þjónustu.  Ekki væri verra ef viðkomandi er jákvæður, faglegur, liðugur, brosmildur og kann samskipti upp á tíu.  Verkefnin eru símsvörun, móttaka viðskiptavina, eftirfylgni fyrirspurna frá viðskiptavinum auk annarra tilfallandi verkefna.

Fréttir
09.01.2015

Við leitum að öflugum einstaklingum

Okkar æðsta markmið er að veita viðskiptavinum okkar 100% uppitíma og það gerum við með því að hafa í okkar röðum öflugt fólk. Einstaklinga sem við treystum fyrir lyklunum að mikilvægustu upplýsingatæknikerfum landsins. Það eru ekki margir sem uppfylla þau skilyrði. Ert þú einn af þeim?

Fréttir
06.01.2015

Fréttabréf RB - Janúar 2015

Nýtt fréttabréf RB er komið út.

Blogg
05.01.2015

Aukin skilvirkni í hugbúnaðargerð

Hjá Reiknistofu bankanna starfa um 70 manns á hugbúnaðarsviði og því eru mörg scrum-teymi að störfum hverju sinni.  Tækniumhverfið er einnig ansi viðamikið hjá okkur þar sem við erum bæði að viðhalda eldri lausnum, útfæra nýjar lausnir og í stórum innleiðingarverkefnum á aðkeyptum lausnum.  Til að flækjustigið verði ekki of mikið í útfærslu, viðhaldi og rekstri á öllum þeim lausnum sem er verið að vinna með þá höfum við útbúið mikið af fyrirfram skilgreindum hönnunarlýsingum og sniðmátum (e. Design Patters and Templates) þvert á teymi og lausnir.

Viðburðir
30.10.2014

Framtíðin í upplýsingatækni fjármálafyrirtækja 2.0

Fagráðstefna RB á Icelandair Hótel Reykjavik Natura 30. október 2014. Gífurlega áhugaverð og spennandi ráðstefna um það hvernig upplýsingatækni í fjámálageiranum mun þróast á næstu árum.  Haustráðstefna RB er orðin einn stærsti viðburðurinn ár hvert í upplýsingatækni fjármálafyrirtækja.

Viðburðir
18.09.2014

Chef: Kokkurinn, matreiðslubækurnar og uppskriftirnar

Við hvetjum þig til að taka frá fimmtudaginn 18. september, klukkan 8:30 - 10:00, og mæta á spennandi morgunverðarfund hjá RB. Á fundinum verður fjallað um rekstrartólið Chef, hvað það hefur upp á að bjóða og hvernig RB notar það. Chef er mjög sveigjanlegt tól sem gerir fyrirtækjum kleift að halda utan um vélar í rekstrarumhverfi og dreifa hugbúnaði og kóða.  Auk þess sem það auðveldar fyrirtækjum að skilgreina tæknilega innviði (infrastructure) sína.

Blogg
15.09.2014

Hverjar eru þínar væntingar?

Dags daglega mynda ég mér allskonar væntingar, án þess raunverulega að gera mér jafnvel grein fyrir því sjálf. Ég vakna í rútínu dagsins, bind vonir við að börnin vakni „réttu megin" og þjóti fram úr morgunhress, fer síðan í vinnuna með ýmsar væntingar í kollinum. Væntingar vinnudagsins geta ýmist verið að ráða fram úr krefjandi verkefnum sem ég veit að liggja á borðinu þegar ég mæti, eða bara að kaffibollinn verði jafngóður í dag og í gær hjá kaffiþjóninum á Kaffistofunni Höfðatorgi. Hann gefur mér gjarnan speki dagsins í farteskið. Ég er eiginlega farin að binda væntingar við að það almennt fylgi bollanum. Eðli okkar er svolítið þannig, að innan sem utan vinnustaðarins erum við sífellt að móta okkar eigin væntingar.

Blogg
19.06.2014

Viltu upplifa?

Fyrir rúmri viku var ég „plötuð" til að vera driver fyrir  samstarfsfélaga mína sem höfðu skráð sig til leiks í Blue Lagoon Challenge. Mitt hlutverk var einungis að sækja þá í Bláa lónið þar sem endamark keppninnar var. Ég hef aldrei tekið þátt í hjólakeppni, rekin áfram af forvitni sló ég til. Vikuna fyrir hlustaði ég á umræður þeirra félaga í liðinu RBz; hvaða tíma þeir ætluðu að ná, hvort létta ætti hjólið, hvernig þeir ætluðu klæddir, hvað ætti að innbyrða á leiðinni, hvernig veðrið yrði, hvenær ég ætti að koma að sækja þá o.s.frv.

Blogg
10.06.2014

Þegar Captain Kirk kenndi mér að vera verkefnastjóri

Í haust var ég plataður til þess að taka að mér verkefnastýringu á Torgvæðingu Grunnkerfa RB. Á þessum tíma hafði ég aðeins litla reynslu af verkefnastjórn og ég fór því að velta fyrir mér til hvaða fyrirmynda ég myndi vilja líta. Í gegnum tíðina hef ég haft marga góða yfirmenn en eiginlega enginn þeirra var frábær verkefnastjóri það var því ekki annað að gera en að leita fanga víðar. Sem betur fer þá mundi ég eftir einum kappa sem ég gat leitað til og það var Captain James Tiberius Kirk. Hann hefur á sínum glæsta ferli stýrt stórum hópi fólks til þess að komast í gegnum hina ótrúlegustu erfiðleika.

Blogg
22.05.2014

Er forritun jafn mikilvæg fyrir krakkana okkar og íslenska eða stærðfræði?

Þegar stórt er spurt er fátt um svör enda ekkert eitt rétt svar til við þessari spurningu og skoðanirnar á þessu örugglega jafn margar og einstaklingarnir sem þær hafa.  Í aðalnámskrá grunnskóla má finna þessi fög auk ensku, dönsku, íþrótta, listgreina, náttúrugreina, samfélagsgreina o.fl. Allt góð, gild og mikilvæg fög og ekkert út á þau að setja.  Upplýsinga- og tæknimenntun má líka finna á námskránni en fær töluvert minni sess en fyrrnefnd fög í henni.

Viðburðir
15.05.2014

Frá gluggaumslögum til tölvuskýja

Við hvetjum þig til að taka frá fimmtudaginn 15. maí, kl. 8:30-10:00, og mæta á spennandi morgunverðarfund hjá RB. Á fundinum verður sögð reynslusaga af hjúpun grunnkerfa og þeim áskorunum sem því fylgir.

Blogg
14.05.2014

Sjálfumglaði hjólarinn

Það er fátt meira óþolandi en feitlagni dúddinn á hjólinu sem þvælist fyrir þér í umferðinni, klæddur allt of þröngum spandexfatnaði, hjólandi eins og hann eigi heiminn. Með skítaglott á smettinu og rífandi kjaft út af engu og gefandi fingurinn hægri vinstri.  Getur hann ekki drullast til að hjóla á gangstéttinni þar sem hann á heima? Þessi dúddi er ég.

Blogg
07.05.2014

Saklaus hugleiðing um mataræði fyrir kyrrsetufólk

Það er örlítið skondið að ég ætli í þessum pistli að fjalla um mataræði fyrir kyrrsetufólk. Sjálfur hef ég alla tíð unnið á gólfinu „tekið vaktina" eins og sagt er í matreiðslunni. En eftir að ég snéri mér að hefðbundnum dagvinnutíma í starfi mínu sem matreiðslumeistari í mötuneyti Reiknistofu Bankanna hef ég í auknum mæli varið frítíma mínum í  hreyfingu s.s. hjólreiðar, sund og hlaup.

Blogg
30.04.2014

Þróun og afkastageta gagnagrunna

Gagnagrunnar hafa undanfarin áratug tekið gríðarlegt stökk í þróun, afkastageta þeirra hefur margfaldast sem og  viðhald og annað utanumhald orðið betra samhliða auknu flækjustigi. Þessi þróun hefur orðið til þess að  margvíslegir möguleikar í forritun með SQL fyrirspurnamálinu hafa litið dagsins ljós. M.a. eru  möguleikar á að varpa gögnum úr einu formi í annað, áður en gögnunum er skilað til forrits, mun fjölbreyttari í dag en áður. Það sem er nýjast og heitast í dag er vörpun úr töfluformi (relational) yfir í JSON (Javascript Object Notation) til að geta flutt gögn yfir í snjallsíma með auðveldum hætti.

Blogg
15.04.2014

Sérstaða RB á heimsvísu í greiðslumiðlun

Við Íslendingar gerum okkur ef til vill ekki grein fyrir því hversu góðrar og skilvirkrar greiðslumiðlunar við njótum.  Í nágrannalöndum okkar er algengt að það taki einn dag að færa fjármuni á milli bankastofnanna. Sem dæmi, ef ég geri millifærslu í netbanka Landsbankans yfir á reikning í Arion banka, þá gerist það á stundinni, um leið og ýtt er á ,,millifæra". Oft er talað um T og T+1 í þessu sambandi, þar sem T  stendur fyrir daginn sem beðið er um millifærslu (transaction date) og T+1 stendur þá fyrir daginn eftir, þegar millifærslan er komin í gegn á áfangastað. Í sumum tilfellum getur millifærsla í nágrannalöndum okkar tekið þrjá daga eða T+3, en hjá okkur gerist þetta samdægurs eða T.

Blogg
08.04.2014

Stjórnendavandamál?

Á síðustu árum og áratugum hefur mikið verið fjallað um frammistöðustjórnun. Helstu áherslurnar hafa verið um hvað stjórnendur þurfa að gera gagnvart starfsfólki til að ná fram góðri, eða bættri frammistöðu hjá starfsfólki.

Viðburðir
22.10.2013

Framtíðin í upplýsingatækni fjármálafyrirtækja

Fagráðstefna í Hörpu Þriðjudaginn 22. október kl. 13:00 til 16:30. RB hefur sett saman gífurlega áhugaverða og spennandi ráðstefnu um það hvernig upplýsingatækni mun umbreyta tækniuppbyggingu fjármálageirans og þau hagræðingartækifæri sem í henni felast.  Þá verður fjallað um nýsköpun og hvernig hugmyndir komast í framkvæmd og verða að veruleika.

Sjá yfirlit

Ávallt 100%

Ástríða

Við höfum ástríðu fyrir því sem við gerum og leyfum sköpunargleðinni ávallt að njóta sín.

Gildin okkar