Fréttir

RB aðili að fyrsta gagnaveri í Reykjavík ásamt Opnum kerfum og Vodafone

RB aðili að fyrsta gagnaveri í Reykjavík ásamt Opnum kerfum og Vodafone
25.02.2018

Fyrsta gagnaver Reykjavíkur verður reist á Korputorgi á árinu, samningar þess efnis voru undirritaðir í dag á Korputorgi. Um er að ræða umhverfisvænt hátæknigagnaver í eigu Opinna kerfa, Vodafone, Reiknistofu bankanna og Korputorgs ehf. Reiknað er með að gagnaverið verði eitt það tæknilegasta og öflugasta á landinu. Um að ræða allt að 5 þúsund fermetrar nýbyggingu sem byggð verður í áföngum og mun fyrsti áfangi kosta hátt í milljarð króna. Framkvæmdir hefjast fljótlega og gera áætlanir ráð fyrir því að fyrsti áfangi verði tilbúin snemma árs 2019.

Gagnaverið verður aðalvélarsalur Reiknistofu bankanna og mun það sinna kröfuhörðum viðskiptavinum félagsins sem leggja ríka áherslu á rekstrar- og gagnaöryggi. Gagnaverið mun uppfylla svokallaðan Tier III staðal, sem þýðir að í allri þjónustukeðju gagnaversins verður nægur varabúnaður til staðar til að tryggja 100% þjónustuöryggi.

Staðsetning gagnaversins er mikilvæg en þar koma saman margir þættir sem skipta miklu máli. Afhendingaröryggi raforku er mikið og þegar liggja gagnastofnbrautir (afkastamiklir ljósleiðarar) um Korputorg. Þá er leyfi fyrir gagnaver til staðar á lóðinni.

Mikil sóknarfæri eru í gagnaversiðnaði sem er sá iðnaður í heiminum sem vex einna örast. Þá má geta að nýlega var Ísland valið öruggasta land í heimi fyrir gagnaver af alþjóðalega stórfyrirtækinu Cushman & Wakefield.

„Það ánægjulegt að þátttaka RB í verkefninu tryggi framgang þess og að til verði öruggt hágæða gagnaver á höfuðborgarsvæðinu. Gagnaverið er sérsniðið að þörfum RB og uppfyllir ströngustu kröfur viðskiptavina RB, sem leggja mikla áherslu á að tryggja öryggi þjónustu til neytenda og fyrirtækja. Verkefnið skapar nýjan valkost fyrir fyrirtæki og stofnanir og ýtir þannig undir samkeppni á gagnaversmarkaðinum á Íslandi. Um er að ræða öruggan og hagkvæman kost sem á eftir að höfða jafnt til innlendra sem erlendra fyrirtækja“ segir Friðrik Þór Snorrason forstjóri Reiknistofu bankanna.