Fréttir

RB innleiðir ný greiðslu- og innlánakerfi fyrir Landsbankann

08.11.2017

Helgina 18.-19. nóvember mun RB innleiða nýtt greiðslu- og innlánakerfi, frá Sopra Banking Software, fyrir Landsbankann. Leitast hefur verið við að takmarka eins og kostur er truflun á þjónustu til viðskiptavina á gangsetningarhelginni en ekki verður hjá því komist að öllu leyti. Nánari útlistun á þeirri þjónustuskerðingu sem verður þessa helgi má sjá í fréttatilkynningu frá Landsbankanum hér að neðan. 

______________________________________

Fréttatilkynning frá Landsbankanum:

Skerðing á þjónustu í netbönkum og útibúum 18.-20. nóvember

Vegna innleiðingar á nýju tölvukerfi 20. nóvember nk. þarf að skerða þjónustu í netbönkum Landsbankans helgina 18.-19. nóvember. Þjónusta í netbönkum og útibúum verður einnig skert fram eftir degi mánudaginn 20. nóvember.

Þessa daga verður hægt að millifæra í netbankanum en upphæðir sem færðar eru á milli bankareikninga verða ekki sýnilegar á reikningsyfirlitum og ráðstöfun þeirra verður takmörkuð. Áfram verður hægt að greiða með debet- og kreditkortum en þó getur orðið tímabundin truflun á notkun debetkorta sunnudaginn 19. nóvember.

Þurfi viðskiptavinir að ljúka mikilvægum bankaerindum fyrir mánudaginn 20. nóvember er mælt með að þeir sinni þeim fyrir helgina 18.-19. nóvember til að forðast óþægindi.

Nánar er fjallað um skerðingu á þjónustu hér fyrir neðan.

Mikilvæg endurnýjun á gömlum kerfum

Endurnýjun á innlána- og greiðslukerfum Reiknistofu bankanna (RB) og Landsbankans er eitt stærsta hugbúnaðarverkefni sem RB og bankinn hafa ráðist í. Nýja kerfið leysir af hólmi mörg eldri tölvukerfi en hið elsta þeirra er um 40 ára gamalt. Í stað eldri kerfa verður tekið í notkun nýtt kerfi frá hugbúnaðarfyrirtækinu Sopra Banking Software. Nýja kerfið einfaldar og uppfærir tækniumhverfi bankans og er ódýrara í rekstri og sveigjanlegra en eldri kerfi. Með Sopra-kerfinu aukast einnig möguleikar á samnýtingu hugbúnaðarlausna í fjármálakerfinu.

Vegna innleiðingarinnar þarf bankinn að skerða þjónustu í netbanka einstaklinga, netbanka fyrirtækja og útibúum helgina 18.-19. nóvember og mánudaginn 20. nóvember. Landsbankinn biðst velvirðingar á óþægindum sem þjónustuskerðingin veldur en hún er nauðsynleg til að innleiðing nýja tölvukerfisins gangi sem best fyrir sig.

Nánar um þjónustu í netbankanum 18.-20. nóvember

  • Hægt verður að millifæra á milli reikninga í netbanka Landsbankans og úr netbönkum annarra banka/sparisjóða en reikningsyfirlit í netbankanum uppfærast ekki. Þar sem reikningsyfirlit uppfærast ekki verður hvorki hægt að millifæra upphæðir sem eru lagðar inn þessa helgi yfir á aðra reikninga né taka þær út í hraðbönkum. Viðskiptavinir geta á hinn bóginn nýtt upphæðir sem millifærðar eru á reikninga þeirra með því að greiða með debetkortum.
  • Hægt verður að greiða inn á kreditkort en innborgun kemur ekki til hækkunar á ráðstöfun fyrr en 20. nóvember.
  • Ekki verður hægt að stofna, breyta eða eyða reikningum í netbanka.
  • Upplýsingar um ógreidda reikninga uppfærast ekki, þ.e. ef reikningur er greiddur birtast ekki upplýsingar í netbankanum um að hann hafi verið greiddur fyrr en síðdegis mánudaginn 20. nóvember. Engu að síður verður hægt að greiða reikninga.
  • Ekki verður hægt að stofna, breyta eða fella niður yfirdráttarheimildir.
  • Ekki verður hægt að stofna, breyta eða eyða beingreiðslusamningum.
  • Ekki verður hægt að panta úttekt á Vaxtareikningi 30.
  • Nettunarþjónusta í netbanka fyrirtækja verður ekki virk.
  • Þjónusta í útibúum og Þjónustuveri bankans verður skert með sama hætti fram eftir degi mánudaginn 20. nóvember.

Tímabundnar truflanir eða þjónustuskerðing sunnudaginn 19. nóvember

  • Tímabundnar truflanir geta orðið á notkun debetkorta.
  • Ekki verður truflun á notkun kreditkorta, Aukakrónukorta, inneignarkorta fyrirtækja, bensínkorta eða gjafakorta.
  • Truflanir gætu orðið á virkni hraðbanka.
  • Lokað verður fyrir farsímabankann, netbanka einstaklinga, netbanka fyrirtækja og B2B-þjónustu fyrirtækja í 2-4 klst.

Þjónustuver opið helgina 18.-19. nóvember

Aðstoð og nánari upplýsingar er hægt að fá með því að hringja í Þjónustuver Landsbankans, s. 410 4000, eða senda tölvupóst í netfangið info@landsbankinn.is.

Þjónustuverið verður opið frá kl. 11.00-18.00 helgina 18.-19. nóvember og frá kl. 9.00-21.00 mánudaginn 20. nóvember og þriðjudaginn 21. nóvember