Fréttir

RB fyrsta fyrirtækið til að taka upp íslenska leikjavædda heilsueflingu

RB fyrsta fyrirtækið til að taka upp íslenska leikjavædda heilsueflingu
09.11.2015

Heilbrigðisfyrirtækið Sidekick Health sem á í samstarfi við MIT, Harvard og virtasta spítala Bandaríkjanna hefur þróað heilsulausn fyrir fyrirtæki.

Starfsfólk RB mun á næstunni fá tækifæri til að sameina heilsueflingu og leik á vinnutíma. RB hefur gert samning við íslensk-sænska heilbrigðisfyrirtækið Sidekick Health um kaup á nýrri vöru fyrirtækisins. Varan nefnist Sidekick og innifelur meðal annars app sem eflir heilsu og vellíðan starfsfólks.

Lausn sem byggir á sterkum vísindalegum grunni

Aðferðafræði Sidekick byggir á sterkum vísindagrunni og klínískri reynslu. Sidekick er einföld leikjavædd lausn sem gerir heilsueflingu skemmtilega og aðgengilega til að ná fram varanlegum lífstílsbreytingum.  Sidekick Health varð þess heiðurs aðnjótandi að MIT Media Lab í samstarfi við Massachussetts General spítalann (MGH) í Boston valdi heilsuleik fyrirtækisins til rannsóknar á lífstílsinngripi fyrir sjúklinga sína. MGH hefur margoft verið valinn besti spítali Bandaríkjanna.

Langvinnir lífsstílstengdir sjúkdómar algengasta orsökin

Langvinnir lífstílstengdir sjúkdómar, svo sem offita, sykursýki 2 og hjartasjúkdómar, valda 86% af dauðsföllum í Evrópu og um 68% dauðsfalla á heimsvísu. Um 70-80% af öllum heilbrigðiskostnaði í Evrópu má rekja til langvinnra lífstílstengdra sjúkdóma.  Bregðast þarf við vandanum með skilvirkum forvörnum en nú fara aðeins 1,6% af heilbrigðisútgjöldum í forvarnir. Langstærsti útgjaldaliðurinn fer hins vegar í að bregðast við vandanum, eftir að skaðinn er orðinn.

Fyrirbyggjandi heilsuefling innan RB

Starfsmenn RB fá aðgang að appinu Sidekick sem meðal annars innifelur heilsutengda leiki og keppnir á milli starfsmanna. Starfsfólk mun bæði geta notað appið til heilsueflingar fyrir sig persónulega og sem hluti af liði sem keppir við önnur lið innan fyrirtækisins og þannig byggja upp stemningu innan fyrirtækisins.  Einstaklingar og lið geta sett sér markmið varðandi t.d. hreyfingu, slökun og teygjur á vinnustöð.  Markmiðin geta þá verið að taka stigann frekar en lyftuna og að auka vatnsdrykkju.  Þá er hægt að nota appið til að koma ýmsum heilsutengdum skilaboðum til starfsfólks s.s. með Youtube myndböndum, heilsuráð, heilsufréttir o.fl.

Safna vatni með UNICEF í leiðinni

Um leið og starfsfólk RB eflir heilsu sína þá safnar það hreinu vatni fyrir börn í neyð með þátttöku sinni, en Sidekick og RB styrkja UNICEF í hlutfalli við virkni þátttakenda .

Herdís Pála Pálsdóttir, framkvæmdastjóri Mannauðsmála og samskipta hjá RB:

„Við leggjum mikla áherslu á að vera stöðugt að efla heilsu starfsfólks RB með því að bjóða upp á ýmis konar fræðslu, þjálfun og þjónustu.  Við bjóðum meðal annars upp á heilsumælingar, bólusetningar, jakkafatajóga, nudd og ýmislegt annað.  Við lítum á þetta sem hluta af því að skapa eftirsóknarverðan vinnustað, sem og okkar samfélagslegu ábyrgð. Við erum afar spennt yfir samstarfinu við Sidekick og hlökkum mikið til að fara af stað að nota appið, sérstaklega liðakeppnina.  Við bindum miklar vonir við notkun appsins og gaman verður að sjá árangursmælingar þegar við höfum notað það í einhvern tíma til dæmis hvort heilsumælingar komi betur út eða að veikindadögum hafi fækkað.  Fyrir utan ávinninginn þá teljum við þetta mjög ferska nálgun og hafa mikið skemmtanagildi fyrir starfsfólk.“

Tryggvi Þorgeirsson, framkvæmdastjóri Sidekick:

„Ég starfaði sem læknir, meðal annars við að meðhöndla lífstílstengda sjúkdóma en um 70-80% af öllum heilbrigðiskostnaði í Evrópu má rekja til langvinnra lífstílstengdra sjúkdóma og eru því hagsmunirnir miklir.  Ég ákvað að venda kvæði mínu í kross og reyna að fyrirbyggja lífstílstengdu sjúkdómana og tók meistaragráðu í lýðheilsufræðum frá Harvard. Í kjölfarið stofnaði ég Sidekick og er það ótrúlega gaman að sjá 3ja ára þróunarvinnu fara í loftið með þessu samstarfi við RB.  Við höfum fulla trú á því að við séum með lausn í höndunum sem á eftir að efla lýðheilsu fólks til lengri tíma.“