Ágrip af sögu

Reiknistofa bankanna var stofnuð 23. mars 1973 og hóf starfsemi í húsnæði Búnaðarbanka Íslands við Hlemm í ársbyrjun 1974. Undirbúningur að stofnun sameiginlegrar tölvuþjónustu fyrir banka og sparisjóði hafði þá staðið síðan 1970.

Á árinu 1975 flutti Reiknistofan starfsemina í húsnæði Útvegsbanka Íslands í Kópavogi og í júlí það ár hófst vinnsla fyrsta bankaverkefnisins, með tölvuvinnslu ávísana- og hlaupareikninga.

Í nóvember 1985 var tekið í notkun í Breiðholtsútibúi Landsbankans afgreiðslukerfi til sjóðsbókunar og sjóðsuppgjörs og beinlínubókunar sparisjóðsreikninga svo og til skráningar færslna í önnur verkefni Reiknistofunnar. Almenn tenging afgreiðslustaða banka og sparisjóða við kerfið hófst í janúar 1986.

Í apríl 1986 flutti Reiknistofan starfsemi sína í húsnæði Seðlabanka Íslands við Kalkofnsveg, en hluti starfseminnar var í Ármúla 13 á árunum 1990 – 2000.

Samstarf um Reiknistofu bankanna markaði tímamót á sínum tíma. Erlendis er sjaldgæft að náðst hafi jafn víðtækt samstarf og hér á landi milli banka og sparisjóða. Aðdragandi að stofnun Reiknistofu bankanna var einkum sívaxandi notkun tékka í íslensku viðskiptasamfélagi, sem kallaði á störf síaukins fjölda bankamanna við skjalaskipti og bókun. Á sama tíma var tölvutæknin að ryðja sér til rúms erlendis. Sameiginleg tölvuvinnsla gerði íslenska bankakerfinu kleift að tileinka sér nýjustu tækni þeirra tíma og grunnurinn var lagður að öflugustu og traustustu viðskiptakerfum nútímans.

Ör tækniþróun og aukin þjónusta eigenda Reiknistofu bankanna við viðskiptamenn sína hefur mótað starfsemi Reiknistofunnar. Samstarf banka og sparisjóða um Reiknistofuna byggir á kostnaðarhagkvæmni og rekstraröryggi.

Ýmsar breytingar, sem gengið hafa yfir íslenskt þjóðfélag svo sem myntbreytingin 1981, tölvutenging allra banka, sparisjóða og afgreiðslustaða þeirra um allt land frá 1986, tenging við erlenda banka fyrir millifærslur fjármagns á milli landa frá 1989, upptaka fjármagnstekjuskatts 1997 og breyting tölvukerfa vegna ársins 2000 eru dæmi um verkefni sem vinna hefði þurft á mörgum stöðum í bankakerfinu, ef samstarfið í Reiknistofunni hefði ekki verið fyrir hendi.

Kerfi Reiknistofunnar eru án efa meðal flóknustu tölvukerfa á Íslandi. Allar greiðslur inn og út af bankareikningum landsmanna fara um tölvur Reiknistofunnar og sama á við um uppgjör milli banka og sparisjóða vegna viðskipta þeirra. Jafnframt er þar uppgjörskerfi og heimildir fyrir stærstum hluta allra rafrænna greiðslna. Rekstraröryggi miðast við að halda öllum kerfum réttum, öruggum og starfhæfum, jafnt tækja- sem hugbúnaði. Gerðar eru afar strangar kröfur til undirbúnings gangsetningar á nýjum kerfum eða breytinga á þeim sem fyrir eru. Jafnframt eru varaleiðir og aukabúnaður tiltækur ef bilanir koma upp.

Örar tæknibreytingar eru fyrirsjáanlegar í bankaheiminum. Notkun tækninnar á eftir að aukast í öllum samskiptum, þ.m.t. bankaviðskiptum. Uppbygging traustra og öruggra kerfa verður áfram mikilvægasta verkefni Reiknistofunnar á næstu árum til að mæta þörfum eigenda og viðskiptavina og jafnframt til að bjóða bestu tækni eins hagkvæmt og kostur er.